Sosial şəbəkələrdə yayımla

Avtosavadsızlıq

Avtomobil sektoru bir marketerin çalışmağı arzu edəcəyi sahələrin seçilənlərindəndir. Burdakı marketinq hərəkətliliyi, istehlakçı davranışına təsir edən faktorların mürəkkəbliyi, məhsulun populyarlığı və eyni dərəcədə zənginliyi vs. O qədər faktor saymaq olar ki. Ən əsası isə istənilən auditoriyada avtomobil mövzusu açılsa azı kişi cinsinin nümayəndələrini müzakirəyə aktiv cəlb etmək mümkün olacaqdır.

Bununla bərabər, avtomobil sektorunun cəlbediciliyi biraz aldadıcı olur. Bəzilərinə çox böyük dövriyyələrin mövcud olduğu bu sektorda “qozsatan” prinsipləri ilə də “çörək qazanmaq” mümkünmüş kimi gəlir. Bəli, bəlkə də çörək qazanmaq olar. Amma nə qədər uzunmüddətli?! Sual budur. Cavab isə əslində bəllidir. “Kəndçi” prinsiplərinin qismən hökm sürdüyü Azərbaycan bazarında “Subaru” marketinqsiz menecmentə çox dözmədi və yetim övlad kimi “Mitsubishi”nin yanına sığınmalı oldu. Belə misallar çox çəkmək olar. Odur ki, bu sektorun çətinliyini dərk etməyin vaxtı çoxdan gəlib, hətta keçib. Amma nə fayda?!

Azərbaycanda şirkətlərin və şirkət sahiblərinin marketinqə yanaşması onsuz da, qənaətbəxş sayıla bilməz. Son vaxtlarda isə avtomobil distribyutorları dalbadal səhv gedişlər isə məyusluq dalğası yaratdı. Bilən bilir ki, adətən qlobal şirkətlər dövriyyənin 4-5 faizini marketinqə ayırmağı distribyutorların önünə tələb kimi qoyur. Təbii ki, başqa tələblərlə bərabər. Elə bu tələblərin ödənməməsi, FNC Motors və Subaru Azərbaycanın baş bəlaları oldu. 4-5 faiz məsələsini avtomobil şirkətlərinə tətbiq etdikdə isə 7 rəqəmli büdcələrin yarandığını görmək çətin deyil. Bu isə geniş marketinq faəliyyətləri üçün platforma deməkdir.

Deməli əslində avtonəhənglər marketinq büdcələri baxımdan çətinlik çəkmirlər. Qalır bu büdəcələrin effektiv istifadəsi. 3 aydır bütün avtobusların arxasından boylanan şiri nəyin əsəbiləşdirdiyini 2 həftədir öyrənmişik. “Jaguar”ın və “Land Rover”in təşviqatı üçün avtobusdan daha qeyri-effektiv vasitə “Azərbaycan müəllimi” və “Xalq qəzeti” qəzetləri olardı hərhalda. Yenə də Kristal bilən məsləhətdir...

“Porsche Bakı Mərkəzi”nin etdiyi isə tam skandaldır – sən demə “Panamera”lar “Porsche Bakı Mərkəzi”ndə 95 min manatdan başlayan qiymətlərlə satılırmış. Bunu da şourumda filan yox, ATV-nin özündə - tv çarxda yazıblar. Bu məsələ “Porsche”nin qlobal ofisinə çatdırılsa yəqin ki, Bakı mərkəzi xəbərdarlıq alardı. Axı bir superbrendi belə sıraviləşdirmək hüququ kimə verilib?

Yoxsa, 150 minlik X6-nı 145 minə almaq üçün Almaniyaya adam göndərənlərin olduğu bir cəmiyyətçün elə belə yaxşıdır? Yox e... İnanmıram ki, bu addım “Porsche”yə baş ucalığı və satış artışı gətirsin.

“Kia”nın Kadenzası üçün istifadə etdiyi “İntellektual dinamika” isə dalğanın son və öldürücü zərbəsi oldu. “Dinamika” sözünü istifadə etmək üçün 2-3 ay gözləmək olmazdı? Sonra da “Kia”nın Azərbaycan ofisi “Hyundai Auto Azerbaijan”ı bəyənmir. Başa düşürəm ki, qlobal səviyyədə “Kia” “Hyundai”ya məxsusdur və korporativ kopiraytinq dəst-xəttləri yaxındır. Amma ingilislərin lüğətində söz qurtarıb?

“Subaru” “sönür” “Ford”un “qol-qanadı sınır”, “Peugeot”un “bazarı ölür”, “Honda”nın “işıqları sönür”, “Opel” “sürünür” vs. Hamısı avtodilerlər və avtomobil satıcılarının məsələyə barmaqarası baxmasının nəticələridir. Bu ölkə və bu sektor marketinq savadsızlığını qəbul etmir cənablar!
 

Baxılıb: 5835

Şərhlər