Sosial şəbəkələrdə yayımla

Böhranı hiss edən varmı?

Endirim, promo kampaniyalar, hədiyyələr, ucuz qiymətlət və sair… Bunları marketoloqların böhran vahiməsindən qorunmaq vasitələridir. Lakin belə tədbirlərin həqiqətən əhəmiyyəti varmı? Hədəf kütləsi böhran zamanı öz davranış və düşüncələrini necə dəyişir?  Böhranın nə olduğunu və ya nə gətirəcəyini bilirlərmi? Ümumiyyətlə böhranı hiss edənlər varmı, yoxsa bu sadəcə panikadır?

İnsanlar daha pissimistdirlər

Həyat öz axarı ilə bir neçə ay əvvəl olduğu kimi davam edir. Dəyişən yalnız insanların düşüncələri, münasibətləri və gələcəyə inamlarıdır. Kənardan dəyişiklik hiss olunmasa da, insanlar arasında yaranan narahatlığa səbəb dünya maliyyə böhranıdır. Geniş yayılmış fikirlərdən biri böhranın artıq ölkədə olması, lakin təsirlərinin isə bir müddət sonra hiss olunacağıdır. Bu fikri 2009-cu il May ayında TNS Azərbaycanın keçirdiyi sorğuda iştirak edənlərin 51%-i söyləmişdir. Respondentlərin yalnız 23%-i daha optimistik düşünərək ölkədə böhranın olmadığına və gələcəkdə də olmayacağına inandıqlarını söyləmişlər. Qalanları isə hazırda maliyyə çətinliyi olmasa da gələcəkdə bunu gözlədiklərini bildirmişlər. 

 “Gəlir mənbələrinin itirilməsi” fikri kabus olub

İnsanlar həqiqətən də öz işlərini itirməkdən və ya ailələrini lazımi gəlirlə təmin edə bilməmək qorxusu ilə üzləşirlər. 70% böhran zamanı işsiz qalmaqdan qorxduğunu bildirib. Çətin maliyyə dövründə işini itirməkdən başqa kreditlərin və borcların vaxtında ödənə bilməməsi qorxusu da insanları gecələr rahat yatmağa qoymur. Bankdakı əmanətlərini itirməkdən isə 18% respondent qorxduğunu bildirib. Ümumiyyətlə əksər insanlar böhrandan ilk növbədə bankların əziyyət çəkdiklərini bildiriblər.
Maraqlıdır ki, maliyyə çətinliyi yaşayarkən öz sevimli markalarını itirməkdən cəmi 5% insan qorxur. Bu insanlar daha ucuz marka almağa məcbur qalmaq və sevdikləri bahalı markalardan məhrum olmağı özləri üçün kabus hesab edirlər. Markaya bağlılığın zəif olması maddi durumun pisləşdiyi halda insanların daha asanlıqla ucuz markalara keçməsinə şərait yaradır. Bir çox məhsul sektorlarında isə böhran markaya emosional və ya rasional bağlılıq yaratmaq üçün əla imkandır. Bunun üçün hədəf kütləsini “çətin anlarda” tək buraxmamaq və daim yanında olduğunuzu hiss etdirmək lazımdır. 

“Mebel alışını təxirə salarıq”

Əgər böhran ailəyə təsir edərsə, büdcəyə qənaət etmək üçün atılacaq ilk addım mebel alışını təxirə salmaqdır. Qənaət etmək üçün təxirə salınacaq məhsullar sırasında mebel alışından sonra məişət əşyaları və geyim alışı gəlir. Respondentlərin böyük hissəsi (36,5%) ailə büdcəsinə qənaət etmək üçün ilk növbədə məişət əşyası və geyim almaqdan imtina edərdilər. Lakin, geyimdə qənaət edənlər arasında qadınlarla müqaisədə kişilərin payı daha çoxdur. Qadınlar maddi çətinlik çəksələr də geyim almağa davam edəcəklər.

Maraqlı məqamlardan biri də ailə büdcəsinə qənaət etmək üçün 32,5% insanın supermarketlərdən deyil, kiçik ərzaq dükanlarından alış-veriş etməyi düşünməsidir. Bir çoxları iri supermarketlərdəki qiymətlərin kiçik mağazalara nisbətən baha olduğunu düşünür və buna
görə də maddi çətinlik zamanı supermarketlərdən imtina edirlər.

Pulu evdə saxlamaq daha etibarlıdır

Gərginlik yaşayan və ətrafda baş verənlərdən çaş-baş qalan insanların 42,5%-i heç kimə və heç nəyə etibar etmədən pullarını nəğd şəkildə evdə saxlamağa üstünlük verirlər. Onların fikrincə pulu itirməmək üçün ən yaxşı vasitə evdə saxlamaqdır, çünki həm banklara, həm də daşınmaz əmlak bazarına böhran zamanı insanlarda inamsızlıq var. Bir çoxlarının fikirncə böhran ilk növbədə maliyyə sektoruna və iri biznes sahələrinə təsir edəcək. Lakin, bu fikirlərə baxmayaraq ənənəvi olaraq pullarını daşınmaz əmlak şəklində saxlamağa 34,5% respondent üstünlük verir. Sorğuda iştirak edən 200 nəfərin 16%-i isə pullarını bank əmanətlərinə etibar edərdilər.

Böhran bir çox markalar üçün “zəif-güclü” mübarizəsində qalib gəlmək üçün imunitet yaratmağa imkan verir. Çətin anlarda dəyişən davranış və düşüncələri bildikdə müştərilərin sizdən gözlədiklərini onlara çatdırmaqla bazarda mövqeyinizi qoruya bilərsiniz. Belə bir şəraitdə yeni strateqiya qurmazdan və ya kampaniya başlamazdan öncə hədəf kütlənizin böhranlaşmış davranışlarını öyrənin.


Baxılıb: 3933

Şərhlər